जि सुजेननायनिफ्राय जागायनानै जि सुगानायसिम आइजो सावस्रिया बिनि जिउ मोनसेयाव जोबोद गोनांथार। बैसोगोरानि सावस्रि, मोदोमाव थानाय, आरो गथʼ जोनोम होनो हानाय समखिनिया जोबोद नोजोरहोनो गोनां जेराव नांगौ रोखोम जोथोन लानांगौ जायो। बे पर्टेलनि गेजेरजों जेंना भुगिनाङा लासे बिमा जानो हानाय आरो गोगो गथʼ जोनोम होनो हानाय देहा जोथोननि फारसे खौरां होनाय जादों।
गथʼ आरो जोनोम जाजेननाय गथʼ, देरनाय आरो जौगानाय, थांखिखौ दांहैनो हानाय, थिखा थुनाय, लोमजानाय समाव जोथोन लानाय, पुष्टि बायदिया गथʼफोरनि सावस्रियाव मोनसे गाहाइ बिफाव लायो। गथʼफोरा पुष्टि गैयै जानाय आरो सनदेरग्रा बेरामनिफ्राय जोबोद गिनांगौ थायो। गोख्रोङै देरनाय आरो जौगानायजों लोगोसे नांगौ रोखोम जोथोना पुष्टि गैयै जानाय आरो सनदेरग्रा बेरामजों सनदेरजानायनिफ्राय बारगʼहोयो। गथʼफोरनि जिउनि मोनफ्रोम थाखो जेरै जोनोम मोनजेननाय, खुदिया, गदों गदा थाबायजेननाय आरो फरायसालियाव थांनाय गथʼफोरनि बेराम होबथानो आरो नांगौ रोखोम देरहोनो आरो जौगाहोनो थाखाय थोजासे जोथोन आरो नोजोर होनांगौनि गोनांथि थायो। बे पर्टेला बेफोर गासैबो आयदानि सायाव गुमुर होगोन।
हादरनां सावस्रि मिसना गासैबो सुबुंफोरनो नांगौ रोखोम सावस्रि जोथोन होनो नागिरदों। बेफोरनि गेजेराव आइजो आरो गथʼफोरखौ लाफानानै नासयना दोनजानाय हानजाफोरनो गोरलैयै मोननो हानाय राहा खालामनायजों लोगोसे थोजासे जोथोन मोननो हानाय बादियै हान्जाफोरनो मोनथाइ होनायजों लोगोसे राइजो-राजाफोरनि सावस्रि जोथोन राहाखौबो गोख्रों खालामनाय जागोन। बे पर्टेलनि गेजेरजों एनएइचएम आरो बायदिसिना सावस्रिजों सोमोन्दो गोनां खान्थि आरो मावथांखिनि गुमुर होनाय जागोन।
आयुष थामहिनबा आयुरवेदा, योगा, नेसारʼपेथि, इउनानि, सिद्ध आरो हमिअपेथि (आयुष) आ सानफा एफा अनसायजाबोगासिनो दं। बे पर्टेला गुबै गुमुरफोर, दायग्नसिस, जोथोन आरो बेजों लोबबा गोनां फसंथानफोर आरो आयुषजों सोमोन्दो गोनां मावथांखिफोरनि सोमोन्दै फोरमायना होयो।
पुष्टिया जाग्रा आदाराव थाफाग्रा। बेखौ देहायाव नांगौ जानाय आदारजों लोगोसे लाफानाय जायो। गोगो पुष्टिगोनां आदार-थोजासे आरो नांगौ जखानि जानाय आदारजों लोगोसे नांगौ रोखोम देहानि खामानि मावनायानो गोगो सावस्रिनि गुबै मोनथोर। बे पर्टेलाव आदार जानायनि नेम, जाग्रा आदार आरो बेफोरनि पुष्टिनि बेसेन, पुष्टिगोनां आदारनि सानस्रि आरो राहा आरो गुबुन गोबांनि सायाव गियान होनाय जागोन।
बेरामा जादों ओरै बादि मोनसे सोदोब जाय अंगʼ एबा देहानि सरासनस्रा खामानि मावनायखौ लोरबां खालामना होयो। बेफोरखौ मोनथाम बाहागोआव राननो हागौ। बेफोर जादों-थाफाखानाय बेराम, बायजोनिफ्राय हाबफैनाय बेराम आरो बबेनिफ्राय फैदों मिथियै बेरामफोर। बे पर्टेलाव बे रोखोम बेरामफोरनि सोमोन्दै गुमुर होनाय जागोन।
सावस्रि रैखाथिनि गुबै आरो गाहाइ बुंफुरलुवा गोगो लोंग्रा दै, दाखोर दालाखौ सामलायना गारनाय, आबहावा गोथार खालामनाय आरो गावारि सावस्रि। बे पर्टेलाव जोबोद गोनांथि गोनां बे आयदाफोरनि सोमोन्दै गुमुर होनाय जायो।
WHO (बुहुमनां देहा आफाद) आ गोसोआरि सावस्रिखौ सासे मानसिया गावनि गुन-गियानखौ हमदांनो हानाय, जिउनि बायदिसिना दुखु दाहाजों जुजिथानो हानाय, गावनि हारिनो माबा मोनसेसो होलांनो हानाय बादियै मोजां खामानि मावनाय आरिखौनो फोरमायना होदों। बे पर्टेलनि गेजेरजों बे गोख्रों सावस्रि बिथिंखौ सोफानाय जादों जाय आथिखालाव मानसिफोरनि नोजोर बोगासिनो दं।
गिबि मददा लोमजानाय एबा जखम जानायनि सिगांग्रो जोथोन लानायनि राहा। बे पर्टेलनि गेजेरजों माबा मोनसे गाज्रि जाब्रबथाइ एबा फिसा फिसौ जखम नावाव एबा मावखʼवाव, फरायसालियाव, कलेज एबा कारखानायाव जानाय समाव गोसोआव लानांगौ गोनां बाथ्रा आरो थियारि खालामना लाखिनो गोनां मुवाफोरनि गुमुर दं।
जोबथा दाफामनाय : 12/4/2020